Minskdə MDB Parlamentlərarası Assambleyasından olan beynəlxalq müşahidəçilərinin Belarus Respublikası Milli Məclisinin Nümayəndələr Palatasının sədri Vladimir Andreyçenko ilə görüşü keçirilib.

Palatanın rəhbəri qeyd edib ki, hazırkı seçki kampaniyası 2022-ci il tarixli konstitusiya referendumundan sonra ilk seçki kampaniyasıdır. Spikerin sözlərinə görə, deputatlar respublika qanunvericiliyinin yenilənmiş Konstitusiyaya uyğunlaşdırılması istiqamətində böyük işlər görüblər – 90-a yaxın sənəd yenidən nəzərdən keçirilib.

İlk dəfə Nümayəndələr Palatasına seçkilər üzrə seçki kampaniyası vahid səsvermə günündə – yerli hakimiyyət orqanlarına seçkilərlə eyni vaxtda keçirilir. Aprel ayının 4-də Respublika Şurasına seçkilər keçiriləcək, aprelin 25-də isə Ümumbelarus Xalq Məclisi çağırılacaq. Vladimir Andreyçenkonun sözlərinə görə, ona Konstitusiya statusu verilir – Məclis Belarusun inkişaf strategiyasını, xarici və daxili siyasətin əsas istiqamətlərini, ölkənin sosial-iqtisadi inkişaf proqramını, milli təhlükəsizlik konsepsiyasını müəyyənləşdirəcəkdir.

Nümayəndələr Palatasının sədri Belarusa seçkilərin monitorinqi üçün deputat və senatorları göndərən parlament rəhbərlərinə təşəkkür edib. O, MDB PA-dan olan müşahidəçilərin təcrübəsini və obyektivliyini qeyd edib.

Qrupun koordinatoru, Rusiya Federasiyası Federal Məclisinin Federasiya Şurası sədrinin müavini Konstantin Kosaçev Belarus parlamentinin aşağı palatasının spikerinə MDB PA-dan olan beynəlxalq müşahidəçiləri parlament seçkilərinin müşahidəsində iştirak etməyə dəvət etdiyinə görə təşəkkür edib.

Vitse-spiker MDB PA-nın Demokratiyanın inkişafı üzrə beynəlxalq monitorinq institutunun ekspertləri tərəfindən keçirilən səkkizinci çağırış Belarus Respublikası Milli Məclisinin Nümayəndələr Palatasına seçkilərin keçirilməsini tənzimləyən qanunvericiliyin öyrənilməsindən danışıb. Onların fikrincə, bu, beynəlxalq seçki standartlarına uyğundur.

Konstantin Kosaçev ekspertlərin rəyini və Belarusda seçkilərin hazırlanmasının uzunmüddətli monitorinqi haqqında hesabatı Vladimir Andreyçenkoya təqdim etdi.

Qrupun koordinatoru qeyd edib ki, MDB PA-dan olan beynəlxalq müşahidəçilər öz işlərində dövlət suverenliyinə hörmət, qərəzsizlik, effektiv köməklik göstərmək, MDB-nin iştirakçı dövlətlərində demokratik seçki standartları, seçki hüquq və azadlıqları haqqında Konvensiyada təsbit olunmuş daxili işlərə qarışmamaq prinsiplərini rəhbər tuturlar.

Görüşün sonunda Konstantin Kosaçev MDB PA Şurasının sədri, Federasiya Şurasının sədri Valentina Matviyenko tərəfindən MDB PA-nın fəaliyyətində fəal iştirakına və MDB dövlətləri xalqları arasında dostluğun inkişafına verdiyi töhfəyə görə imzalanmış fəxri fərmanı Vladimir Andreyçenkoya təqdim etdi.

Seçkilər günü MDB PA-dan olan beynəlxalq müşahidəçi qrupu Minskdəki seçki məntəqələrinə səfər edəcəklər. Qrupun tərkibində Azərbaycan, Ermənistan, Qazaxıstan, Qırğızıstan, Rusiya, Tacikistan və Özbəkistan parlamentlərinin nümayəndələri vardır.