7 fevral 2024-cü ildə Azərbaycanda növbədənkənar prezident seçkilərində səsvermə başlayıb. MDB Parlamentlərarası Assambleyasından olan beynəlxalq müşahidəçilər qrupu respublikada və xarici ölkələrdəki seçki məntəqələrində səsvermənin monitorinqini aparır.

MDB PA-nın Monitorinq Qrupunun koordinatoru, Qazaxıstan Respublikası Parlamenti Senatı sədrinin müavini Jakip Asanov və MDB PA Şurasının Baş katibi Dmitri Kobitski Azərbaycan Respublikasının Prezidenti yanında Dövlət İdarəçilik Akademiyasının binasında 2 saylı seçki məntəqəsində olublar.

Məntəqədə onlar seçki qutularının kilidlənməsində və səsvermənin başlanmasında iştirak ediblər. Müşahidəçilər bütün lazımi prosedurların tam həcmdə aparıldığını, səsvermənin plan üzrə – saat 8:00-da açıldığını təsdiqləyiblər.

Koordinator və Assambleya Şurasının Baş katibi bir sıra digər seçki məntəqələrində də olublar.

Monitorinq qrupunun üzvləri gün ərzində respublikanın paytaxtındakı seçki məntəqələrində fərdi marşrutlar üzrə müşahidə aparırlar.Beynəlxalq müşahidəçilər seçki komissiyalarının rəhbərləri, yerli müşahidəçilər və səsverməyə gələn vətəndaşlarla söhbət edirlər. Qrup üzvləri informasiya materiallarının mövcudluğuna və tamlığına, səsvermənin gizliliyinin təmin edilməsinə diqqət yetirirlər. Bundan əlavə, fiziki imkanları məhdud olanlar üçün səsvermə imkanları qiymətləndirilir.

Müşahidə 6 ölkədə yaradılmış xarici seçki məntəqələrində də aparılır.

Xatırladaq ki, MDB PA-dan olan müşahidəçilər qrupuna Belarus, Qazaxıstan, Qırğızıstan, Rusiya, Tacikistan, Özbəkistandan olan deputatlar və senatorlar, Assambleyanın vəzifəli şəxsləri və MDB PA-nın Demokratiyanın inkişafının monitorinqi beynəlxalq İnstitutunun ekspertləri daxildir.

Azərbaycan Respublikasının Mərkəzi Seçki Komissiyası tərəfindən MDB PA-dan olan 38 müşahidəçi akkreditə olunmuşdur.

Ümumilikdə, Azərbaycanda 125 seçki dairəsi üzrə 6 319 seçki məntəqəsi açılıb. Səsvermədə 6 320 500 seçici iştirak edəcək. Onlar üçün 6 524 203 seçki bülleteni hazırlanıb. Səsvermədə iştirak həddi müəyyən edilmir. 1000 seçki məntəqəsi səsvermə prosesini uzaqdan izləmək üçün veb kameralarla təchiz olunub. Azərbaycanın növbədənkənar prezident seçkilərinin nəticələri 17 fevral 2024-cü il tarixinədək yekunlaşdırılacaq.