“Seçkilər və referendumlar: optimal müşahidə modelinin axtarışı” mövzusunda dəyirmi masa

Fevral ayının 20-də MDB PA DİMBİ Bakı filialının direktoru Ramin Rzayev Sankt-Peterburq şəhərində keçirilən MDB PA-nın Demokratiyanın inkişafının monitorinqi beynəlxalq institutunun 20 illiyinə həsr olunmuş “Seçkilər və referendum institutuna etimadın formalaşdırılması: beynəlxalq müşahidənin rolu” Beynəlxalq elmi-praktik konfransı çərçivəsində “Seçkilər və referendumlar: optimal müşahidə modelinin axtarışı” mövzusunda dəyirmi masada iştirak edib.

Tədbirdə deputatlar və senatorlar, Mərkəzi Seçki komissiyalarının (MSK) rəhbərləri və üzvləri, MDB ölkələrindən və digər dövlətlərdən olan alim və ekspertlər iştirak ediblər. Tədbiri MDB PA Şurası Katibliyi rəhbərinin müavini-MDB PA DİMBİ direktoru İvan Müşket açdı.

Tədbirdə Azərbaycan Respublikası Milli Məclisinin Hüquq siyasəti və dövlət quruculuğu komitəsinin üzvü Sabir Hacıyev Qərbi Avropa missiyalarının tərkibində müşahidə təcrübəsini bölüşüb. Müşahidədə, məruzəçinin fikrincə, qərəzsizlik prinsiplərinə riayət etmək və ikili standartlardan çəkinmək vacibdir. Monitorinq qruplarının nəticələri əvvəlcədən müəyyən edilmiş siyasi yanaşmalara deyil, seçicilərin real iradəsinə əsaslanmalıdır. Məhz obyektivlik və milli xüsusiyyətləri nəzərə almaq istəyi, ölkələrin əməkdaşlığa inamını və hazırlığını gücləndirməyə kömək edir.