MDB müşahidəçilər missiyası Qazaxıstanda yeni Konstitusiyanın qəbul edilməsi ilə bağlı referendumun monitorinqini yekunlaşdırıb

16 mart 2026-cı ildə MDB-nin müşahidəçi missiyası Qazaxıstan Respublikasında yeni Konstitusiyanın qəbul edilməsi ilə bağlı referendumun monitorinqini yekunlaşdırıb.

Missiyanın qiymətləndirməsinə görə, ölkə qanunvericiliyi azad və açıq ümumxalq səsverməsi üçün zəruri təminatları özündə ehtiva edir və referendumun hazırlanması və keçirilməsinin bütün mərhələlərində ictimai nəzarəti təmin edir.

MDB PA-dan olan müşahidəçilər səsvermə prosesinin mütəşəkkil və şəffaf olduğunu qeyd edib, monitorinqin aparılması üçün lazımi şəraitin yaradıldığını vurğulayıblar. Referendum ölkə qanunvericiliyinə tam uyğun olaraq yüksək təşkilati səviyyədə keçirilib. Dövlət hakimiyyəti orqanları və referendum komissiyaları vətəndaşlara azad iradə ifadə etmək imkanı verib. Bildirilib ki, beynəlxalq müşahidəçilərə işləmək üçün hər cür şərait yaradılıb.

MDB PA-dan olan qrupun koordinatoru, Azərbaycan Respublikası Milli Məclisi sədrinin müavini Ziyafət Əsgərov vurğulayıb: “Monitorinqin nəticələrinə əsasən MDB PA-dan olan beynəlxalq müşahidəçilər belə nəticəyə gəliblər ki, Qazaxıstanın yeni konstitusiyasının qəbul edilməsi ilə bağlı referendum bütün iştirakçıların hüquq və azadlıqlarına riayət olunmaqla və ölkənin milli qanunvericiliyinə və beynəlxalq öhdəliklərinə uyğun olaraq keçirilib”.

Qeyd edək ki, MDB PA-dan olan müşahidəçilər ümumilikdə 215 seçki məntəqəsində olublar. Qazaxıstanın yeni konstitusiyasının qəbul edilməsi ilə bağlı referendum onun bütün iştirakçılarının hüquq və azadlıqlarına riayət olunması və ölkənin milli qanunvericiliyinə və beynəlxalq öhdəliklərinə uyğun olaraq keçirilib.